मनवां थोर भइल
मटर चना गदराइल रहे
गेहूँ दूधा आइल रहे
खूब फसलिया आइल असो
हियरा भी हुलसाइल रहे
बिन मौसम के आंधी पानी
आके सपना तोरि गइल
देखिके मनवां थोर भइल।
कइसे करज चुकावल जाई
कइसे बिटिया लगन धराई
हथफेरो कुछ लोगन के बा
कस बचवन के होई पढ़ाई,
अउरी केवनो आमद नइखे
कइसे इजत बचावल जाई
सबसे बड़ बतिया त ई बा
पूरा साल का खाइल जाई?
निनियां ना अइली अंखियन में
सोचत- सोचत भोर भइल
देखिके मनवां थोर भइल।
कहे लोगवा जुग बदलल बा
घुरहू चोखा रोटी खइलें
दुनिया चांद चहुंपली, घुरहू
ओइजे के ओइजे रहि गइलें,
सइकिल ठर-ठर बाजत लेके
दूध बदे दुधिया जी अइलें
गइया नादी ना बंधब का?
ए घुरहू! तोहरा का भइले?
हड़बड़- हड़बड़ उठलें घुरहू
केतना आजु अबेर भइल !
देखिके मनवां थोर भइल
बहुत जरूरी काम पड़ल बा
सुबहे- सुबहे हरखू अइलें
ए घुरहू! अब पइसा देइद,
दिहले केतना दिन होइ गइलें
घुरहू मन में सोचत रहलें
परगट में कुछ कहि ना पइलें
बल्टी लेके आवत रहली
घुरहू मलकिन सब सुनि गइली
समुझि के पियवा के मजबूरी
अंखियां लोरे लोर भइल
देखिके मनवां थोर भइल।
विंध्याचल सिंह
बुढ़ऊं, बलिया, उत्तर प्रदेश
Comments